Umpasa Simalungun

Aha do artini umpasa ?

Umpasa aima hata, podah atap alinan  na ipadas marhitei usip ni paruhuran domu ma ai hubani situasi pakon kondisi ni parbualan. Umpasa bani na hinan ipakei do bani pargoluhan ni jolma ganup ari. Somal do ai ipakei umpamani laho marsitandaan, na martunangan, sonai homa bani horja-horja/pesta na banggal.

Hajongjongan ni Umpasa na hinan i utamahon tumang do, misalni sada garama atap anak boru na laho martondur maningon do ipersiapkon pambotohni pasal umpasa, maningon ihapil do tongon-tongon umpasa na marpanghonai hubani partoduron. Anggo lape boi marumpasa mararti do ai bahasa lape talup ia martondur atap mangalop boru. Halani ai do ase wajib uhumni sda na marlajar garama atap anak boru maningon mambotoh umpasa. Legan bani panorang sonari, umpasa ipakei pitah bani acara pesta hansa.

Somal ni umpasa ibagi do gabe piga-piga horong domu ma ai hubani artini pakon tujuanni umpasain sandiri, aima :

1. Umpasa ni Namaposo
2. Umpasa Pangindoan
3. Umpasa Haporsayaon atap Ugama
4. Umpasa Pasu-Pasu atap Horas-Horas
5. Umpasa Podah
6. Umpasa Guro-Goru atap Hear
7. Umpasa borit Pinangindo


Piga-Piga Contoh ni Umpasa :
Tubuhan lata-lata,
balog ni juma sihala.
Ulang ham das lupa,
podah ni namatorasta..

Adong do namin ajar,
ajar ni namatua.
Naso bongkot bai ajar,
andungan ni Angkula..

Bokas bokas ni gajah,
italun habungan..
Anggo raja padas titah,
pangkei ma hita manangihon..

Omei ni silkaling pogei,
jadi siranting ponuh..
Anggo seng diri pandei,
pangkei ma manangihon...

Boras talun banua,
boras sini Purba..
Horas ulang mahua.
horas sayur matua...

Boras ijuma roba,
boras ijuma Sihala...
Horas nassiam ulang mahua,
malas uhur, malas angkula...

Boras ampa halambir,
iatas pare sanding...
Horas nassiam namisir,
horas hanami na tading..

Boras poldong-poldong,
gerger bulung happawa...
Horas hanami tondong,
nassiam boru pe ulang mahua..

Boras ibagas supak,
ibaen huparasanding...
Horas nasiam namulak,
horas homa hanami na tading...


Marodor ma ge lombu,
manakkog manginsuah..
Haor hita masombuh,
hunjon huatas sai dapotan tuah..

Turtu nini anduhur,
sogop ipanangkolan...
Tubuh ma anak sipandei maruhur,
nagabe panungkunan...

Sogop ma birik-birik
bani ranting tangkolan...
Malum ma na borit,
tambah ma pansarian..

Siganda sigandua,
urat ni podom-podom...
Nasada gabe dua,
nadua gabe onom...

Assimun na martagan
padua namabigou...
Ragatni halak mangan,
sada pe lang mandilo...

On ma ronggit ni solpah,
birah ilonggi taktak..
On ma borit ni jolma,
girah iboli halak...

Ledang ni pining ai,
paledang ledang pahu...
Loja ni inang ai,
pagodang godang ahu...

Manortor sirajilei,
matoppas para para...
Matangkas hinahilei,
naso manangihon hata...

Laklak marsampur lading,
pahu mambayu pandan...
Halak marlajar doding,
ahu manohu padan..

Talun parmahanan,
appar bulung sirere..
Manumpak ma Tuhan,
naunjah marsibere-bere...

Gadung julur sihampilis,
pangkaratan ni appodui...
Panggeori ni sibolis,
bani halak sigale tonduy...

Bolah ma untei mungkur,
ronjam bai paranggiran...
Ningon do sauhur,
mambogei hatani Tuhan...

Riang riang aribut,
pahondor hondor laklak...
Mabiar au lang dihut,
patonggor tonggor halak..

Talada na homingon,
durimu pe lang sada...
Garama ma ho ningon,
surimu pe lang sada..

Sarangsang pe sarongsung,
pusuk ni awang awang...
Tarsalang inang inang,
iayak amang amang....

Sinraya siniPurba,
sinsilou Sinipanei...
Naijahanin pe lang muba,
asal ma siparholong ni atei..

Boras sabur-saburan,
ibabou ni pinggan pasu...
Horas hita ganupan,
sai Tuhanta ma namamasu-masu..

sumber :

http://pongkalanbolon.blogspot.com/2010/06/umpasa-simalungun.html